“فتحتلك بيتي وكنت هتبطلني كورة”.. رسائل نارية من حسين الشحات لـ الشيبي

تحدث حسين الشحات، جناح الفريق الأول لكرة القدم بالنادي الأهلي، عن التدخل العنيف للمغربي محمد الشيبي، ظهير أيمن فريق بيراميدز، عليه خلال مباراة الفريقين في بطولة الدوري.

حسين الشحات يتحدث عن أزمته مع الشيبي

وقال حسين الشحات، خلال تصريحات فضائية عبر برنامج “الكورة مع فايق”:”متوقعش إن الشيبي ميلعبش أول مباراة أمام الأهلي، وعلمت أن كريم حافظ هو من سيشارك في مركز الظهير الأيمن مع فريق بيراميدز.. الحمد لله أنا لعبت على لاعيبة كبيرة ونجوم كبار، والمعد النفسي بالنادي الأهلي اتكلم معايا قبل المواجهتين علشان أكون حذر، وأنا عرفته إن الموضوع اتقفل بالنسبة ليا”.

وأضاف: “الحمد لله خرجت سليم من إصابة الشيبي، الدخلة كانت مؤذية، ولما وقعت في الأرض واتكلمت مع اللاعيبة عرفت اللاعيبة إنه داخل يأذيني، وعرفت أحمد الشناوي حارس بيراميدز إنه داخل يأذيني”.

وتابع: “عرفت اللاعيبة إنه هيطرد، وقولت للشيبي مش علشان بيني وبينك مشكلة تبطلني كورة”.

حسين الشحات: قعدت 10 أيام مش بنام بعد صفع الشيبي

وعن الواقعة الشهيرة مع محمد الشيبي، قال: “بيني وبين نفسي قعدت أسبوع 10 أيام مش بنام خالص من الموقف، لأن ده مش حسين، وكانت أول مرة أعمل كدة، ومتتكررش إن شاء الله تاني”.

وأضاف: “لما روحت البيت وشوفت الموقف إتضايقت من نفسي، مش بتكلم ومضايق جدًا. أنا اعتذرت مرة واثنين وثلاثة له ولأهله، وأكيد هو متأثر نفسيًا بيها وعلى المستوى الشخصي أنا أعتذرت وكتير. بعتذر له على اللي حصله ولأهله بعتذر له تاني”.

وتابع: “كلنا بنغلط أهم حاجة ترجع لربنا. الشتيمة والسب، وناس كتير تقولي أنت بتشتم أنا مش بشتم، مش مرة غلطت فيها تعلقلي المشنقة، وأنا نفسي متأثر وزعلان من نفسي بعيدًا عن أي حاجة، وعايز الناس تعرف إن أي حد بيغلط كلنا بنرجع لربنا وأتمنى ربنا يسامحني وكله عند ربنا”.